Monday, 4 August 2014

ಲೆನ್ಸು

ಧುಮ್ಮಿಕ್ಕುವ ಜಲಪಾತಗಳು
ಬಿಳಿ ಮೋಡದ ಮಾಲೆಗಳು
ನಿಶ್ಚಲ ನೀಲಿ ಸರೋವರಗಳು
ಕೊನೆಯಿರದ ಹಸಿರ ಹಾಸು
          ದಿಕ್ಕು ದಿಗಂತಗಳೆಲ್ಲ ದೇವಲೋಕದ ಹಾಗೆ
                                               ದೃಶ್ಯ ಕಾವ್ಯ !

ಇಂಥ ಅದ್ಭುತ ರಮ್ಯ ಚಿತ್ರಗಳ
ಸದಾ ಕಾಲಕ್ಕೆ ಸೆರೆಹಿಡಿವ ತವಕ
ಲೆನ್ಸುಗಳ ಆಚೀಚೆ ಮಾಡಿ
'mode'ಗಳ ಬದಲಾಯಿಸಿ
          ಕೊನೆಯ ಕಲ್ಲಿನ ಮೇಲೆ ನಿಂತು ಕಣ್ಣು ಕಿರಿದಾಗಿಸಿ
                                               ಕ್ಲಿಕ್ ಕ್ಲಿಕ್ ಕ್ಲಿಕ್ ....

"ಛೇ...ಫೋಟೋ ಚೆನ್ನಾಗಿಲ್ಲ
ಬೆಳಕು ಕಡಿಮೆಯೇ? flash ಹಾಕಲೇ?
ಮೋಡದ  ನೆರಳೇ.. ಮಳೆಯೇ ..ಹಿಮವೇ ?
ಏನೂ ತಿಳಿಯುತ್ತಿಲ್ಲ ಸ್ವಲ್ಪ ನೋಡಿ ..
          ಸದ್ದಿರದೆ ಸೃಷ್ಟಿಯ ಸೊಬಗು ಸವಿಯುತ್ತಿದ್ದ
                                       ಪತಿರಾಯರ ಕೇಳಿದೆ ...

 "ದೇವರು ದಯೆಯಿಟ್ಟು ಕೊಟ್ಟ  ಲೆನ್ಸಿನ ಮುಂದೆ
ನಮ್ಮ SLR ಗಳು ಯಾವ ಮೂಲೆಗೆ ?!
ಈ ಕ್ಷಣವ ಕಣ್ಣಲ್ಲಿ ಸೆರೆ ಹಿಡಿದು
ಮನದಲ್ಲಿ  ಮುದ್ರಿಸು ಮರೆಯದಂತೆ "
             ತಲೆಯಲ್ಲಿ ತಟ್ಟನೆ ಬಲ್ಬು ಹೊತ್ತಿದ ಹಾಗಾಯ್ತು!
                                "ಹೌದಲ್ಲವೇ  ?  "

ಕಣಿವೆಗಳ  ನಡುವೆ  ನಗುವ ಬಯಲಲ್ಲಿ
ಹುಲ್ಲು ಮೇಯುತ್ತಿದ್ದವು ಹಸುಗಳು ಹಾಯಾಗಿ
ಕೊರಳ ಗಂಟೆಯ ನಾದ ಹೊಮ್ಮಿಸುತ್ತ ...
ಕೆಚ್ಚಲು ಬರಡಾದ ದಿನ ಕಸಾಯಿಖಾನೆ ಎಂದರಿಯದೆ ....
                       ನೋಟಕ್ಕೆ ಮರುಳಾಗಿ ಮತ್ತೆ ಕ್ಯಾಮೆರಾ ಹಿಡಿದು
                                   " ಒಂದು ಫೋಟೋ......." ಎಂದೆ

"ಶ್....ಸುಮ್ಮನೆ ಹಠ ಮಾಡ ಬೇಡ
ಅಂಗಡಿಗೆ ಹೋದಾಗ ಹಸುವಿನ ಗಂಟೆ ಕೊಡಿಸುವೆ
ರಿಟೈರ್ ಆದ ಮೇಲೆ ಹಸು ಸಾಕೋಣ ನಾವು .."
ಎಂದು ತೆಕ್ಕೆಯಲಿ ಹಿಡಿದರು
                        ಏನು ತೋಚದೆ 'ಹೂ....' ಎಂದು ಗೋಣಾಡಿಸಿ
                                              ಬೆಪ್ಪು ಬೆಪ್ಪಾಗಿ ನಕ್ಕೆ !

         





1 comment:

Hema Krishnappa said...

oho!! 2014 has seen a very productive poet!! Thanks to RANI I suppose; she wouldn't give a poet donkey's work!

BTW amma padya tumba chennagide, eegle odiddu.

Hema